Abhi Woh Dard Baqi Hai

Abhi woh dard baqi hai
Agarchay waqt marham hai
Magar kuch waqt lagta hai
Kisi ko bhool janay mein
Dobara dil basaanay mein
Abhi kuch waqt lagna hai
Abhi woh dard baqi hai

Main kaisay nayee ulfat mein
Apni zaat ko gum kar doon
Kay meray jism-o-wajdaan mein
Abhi woh fard baqi hai
Abhi us shakhs ki mujh per
Nigah-e-Sard baqi hai
Abhi to Ishq kay raston ki
Mujh per gard baqi hai...

Abhi Woh Dard Baqi Hai


Agarchay : Although
Ulfat : Love
Zaat : Personality
Fard : Account Book, Individual, Member, Unique
Gard : Dust

--Ahmed Faraz

Ranjish Hi Sahi

Ranjish hi sahi dil hi dukhane ke liye aa
Aa phir se mujhe chhod ke jaane ke liye aa

Pehle se marasim na sahi phir bhi kabhi to
Rasm-o-rah-e-duniya hi nibhane ke liye aa

Ab tak dil-e-khushfeham ko tujh se hain umeedain
Ye aakhri shamein bhi bujhane ke liye aa

Kis kis ko batayenge judai ka sabab hum
Tu mujhse khafa hai to zamane ke liye aa

Ek umr se hoon lazzat-e-girya se bhi mehroom
Aye raahat-e-jaan mujhko rulaane ke liye aa

Kuchh to mere pindar-e-mohabbat ka bharam rakh
Tu bhi to kabhi mujhko manaane ke liye aa

Maana ke mohabbat ka chhupana hai mohabbat
Chupke se kisi roz jataane ke liye aa

Jaise tumhein aate hain na aane ke bahaane
Aise hi kisi roz na jaane ke liye aa

Giriya - Weeping, Crying
Bharam - Consideration, Regard
Pindaar - Arrogance, Ego, Pride, Self-esteem
Marasim - Agreement, Relationship
Ranjish - Anguish, Distress, Enmity

Poet: Ahmed Faraz